میٹھا پانی ۔۔۔۔۔۔ سید ضمیر جعفری

 نومبر کے آخری دن تھے کہ جناب منشا یاد نے کہا ۔ جناب ممتاز مفتی کے " روغنی پتلے " آ گئے ہیں ۔ کتاب کی رونمائی کی تقریب میں آپ  کو اظہار خیال کرنا ہو گا ۔ انہوں نے یہ بھی بتایا کہ تقریب دسمبر کے پہلے ہفتے میں متوقع ہے ۔ تھکے ہوئے جسم اور نچڑے ہوئے ذہن نے معذرت کا مشورہ دیا ۔

 مگر انکار نہ ہو سکا ۔ معاملہ ممتاز مفتی کا تھا ۔ جس کو میں ادب کا مفتی اعظم سمجھتا ہوں ۔

 منشا صاحب سے تو میں نے کہہ دیا تھا کہ :

 " اچھا جوان اللہ مالک ہے "

 پاؤں تلے سے زمین اس وقت نکلی جب اگلے دن محترمہ فریدہ حفیظ کے دعوت نامے سے یہ معلوم ہوا کہ تقریب دو دسمبر کو ہو رہی ہے ۔ بخدا میں بھول ہی گیا تھا کہ دو دسمبر کی تاریخ دسمبر کے پہلے ہفتے میں ہی آ جائے گی ۔ میں گھبراہٹ میں      بڑ بڑایا۔

 " لینا کہ چلا میں "

 اتفاقاً اس وقت میرے پاس ایک کرنل صاحب تشریف رکھتے تھے ۔

 وہ بولے ۔

 " کہاں چلے ہو "

 میرے یہ دوست ریٹائرڈ کرنل ہیں ۔ ریٹائروں کے پاس ریٹائر ہی آتے ہیں ۔

 بہر کیف میں نے کرنل سے اپنی الجھن بیان کی کہ گزشتہ دو ہفتوں میں دو فرمائشی مضمون لکھ چکا ہوں ۔ اب مجھے ممتاز مفتی پر مقالہ لکھنا ہے ۔ ممتاز مفتی کو ٹرخایا بھی نہیں جا سکتا ۔ میں اس کی تحریر کا عاشق ہوں ۔ میری سمجھ میں نہیں آ رہا کہ اس ایمرجنسی میں اب میں اس سمندر کو ، کوزے میں  کیوں کر بند کروں ۔

 " بند " کے الفاظ پر کرنل صاحب کی خاموشی کا " بند " ٹوٹ گیا  ۔ کڑک کر بولے ۔

 " ہم بند کریں گے "

 کرنل صاحب ممتاز مفتی سے واقف تھے ۔ ان کی " گہماگہمی " اور " لبیک " ان کی نظر سے گزر چکی تھی ۔

 کہا : تمھارے ممتاز مفتی کی گہماگہمی سے دل میں تو بہت گہماگہمی ہوئی ۔ مگر اس خوف سے کہ اگر یہ کتاب بچوں نے پڑھ لی تو وہ خبیث بہت جلد جوان ہو جائیں گے ، میں نے یہ کتاب کوارٹر ماسٹر کے اسٹور میں رکھوا دی ۔

 حج کا قصہ کیا تو کسی نے ان کی " لبیک " لا دی ۔ خیال تھا کہ اس سے منی اور مزدلفہ کی Map reading سمجھنے میں کچھ مدد ملے گی ۔ مگر بھائی ہمیں تو اس سے یہی پتہ نہیں چلا کہ یہ کتاب حج کی طرف بلاتی یے یا حج سے روکتی ہے ۔

 ہمارے فوری مسئلے کے بیچ کرنل صاحب نے فرمایا ۔ مجھے حیرت ہے کہ تم اپنی کتابیں خود لکھتے ہو ۔ امریکہ میں تو مصنف کوئی ہوتا ہے اور کتاب کوئی لکھتا ہے ۔ جس طرح ایشیا میں آج بھی کئی ایسے ملک موجود ہیں کہ ملک کسی اور کا ہوتا ہے اور حکومت کوئی اور کرتا ہے ۔

 میرے گھر میں مفتی کی دو کتابیں ہی تھیں ۔ " علی پور کا ایلی " اور " روغنی پتلے " ۔ میں نے سوچا علی پور کا ایلی ان کو دے دوں جو لحافوں والے صندوق میں پڑا تھا ۔ بیوی کہتی رہتی تھی کہ اس کتاب نے خواہ مخواہ ایک لحاف کی جگہ گھیر رکھی ہے مگر جب کرنل صاحب نے " علی پور کا ایلی " دیکھا تو کچھ دیر تک دیکھتے ہی رہے ۔ جیسے سکتے میں رہ گئے ہوں ۔ میں نے پوچھا :

 " کیا سوچ رہے ہیں "

 بولے ۔۔۔ابھی تو میں فوکسی پر آیا ہوں گھر جا کر " علی پور " کی ٹرانسپورٹیشن کے لئے Pick - up بھجواتا ہوں ۔

 بڑھاپا ، ماہ و سال سے نہیں ، ارادے سے آتا ہے ۔ ممتاز مفتی کبھی بوڑھا نہیں ہو گا ۔ ایک مرتبہ آپ اسپتال میں جا لیٹے ۔ میں عیادت کو گیا تو ان سے اپنی حماقت پر ایسی ایسی پھبتیاں سننا پڑیں کہ الٹا اپنے آپ پر نادم ہو گیا ۔

 کہنے لگے گھر والوں اور دوستوں کو کچھ شتر غمزے دکھانا مقصود تھے ۔ ابھی وہیں بیٹھے تھے کہ ان کا ایک نوجوان ارادت مند ، عیادت کے لئے آ گیا ۔ اس سے فرمایا :

 " برخوردار ، مجھے امید ہے تم میری اگلی سالگرہ پر ملنے آو گے ۔

 ماشاءاللہ ۔ تمھاری صحت تو بہت اچھی معلوم ہوتی ہے ۔ "

 میٹھا پانی ۔۔۔۔۔۔ سید ضمیر جعفری